Woher stammt der Name "Appenberg"?

In der Wochen-Zeitung Nr. 18 vom 4. Mai 2017 hat Bruno Zürcher die Herkunft und Bedeutung des Ort- und Flurnamens "Appenberg" wie folgt erklärt:

 

Dr Appebärg heisst scho sit über 600 Jahr eso

Ufem Appebärg hets hüt e bekannti Wirtschaft mit Hotäu. Für was me vor nes paar hundert Jahr dert ueche isch, weiss i nid. Was aber klar isch: Dr "Appebärg" fingt me scho i sehr aute Dokumänt. Unger angerem toucht dä Ort bi Oberhünige, wo aber zur Gmein Mirchu uf der angere Tausyte ghört, imene Rodu vom Ougustinerorde uf, wo um ds Jahr 1350 isch verfasst worde. Dert drinne steit "ze Appemberg". I ähnlech aute Urkunde isch denn o "ze Appenberge" notierrt worde - auso scho ganz ähnlech wie hüt! Natürlech isch d Schribwys vo däm Ortsname nid über aui Jahrhunderti geng glych blibe. 1597 isch im Signouer Urbar "Mappenberg" gschribe worde oder i de Amtsrächnige vom Jahr 1701 "Aeppenberg". Im Grosse u Ganze het sech die Bezeichnig aber ghaute - obschon äue nid mänge gwüsst het, was das Wort bedütet. "Appebärg" meint ganz eifach "dr Bärg von Appo". Das Gebiet dert dörfti im Mittuauter amene Maa ha ghört, wo eso het gheisse.

I ha vore Dürig ghört, dass dr "Appebärg" vo "apere Bärg" chömi. Vo dr Schribwys i de historische Dokumänt dütet aber nid grad viu ufne Zämehang mitem authochdütsche "apar" häre. Das Wort meint übrigens nid nume "schneefrei" sondern o trochnigs Land mitere nume dünne Humusschicht. Dass das mit em "abere Bärg" zimli sicher nid stimmt, zeigt o dr Umstang, dass es i dere Gägend genereu kener Ortsnäme git, wo sech uf ds Wort "aper" bezieht.

Dr autdütsch Personename "Appo" isch e Churzform zum Byspiu vo "Adalbert" gsy. Dä einstig Bsitzer vom "Appebärg" chönnt scho no e edleri Abstammig ha gha; schliesslech meint dr erscht Teu "Adal" äbe grad "edel". Wär genau dr Gründer vom "Appebärg" isch, hani nid usegfunge. Sicher isch aber, dass dä Ort e längi Gschicht het.

Da derzue passt e Ort, wo scho "ewig" isch. Im bärnische Urbar isch 1460 "vff dem eew zun" notiert worde. "Eew" meint "ewig", aber o "ehrhaft" u "rächtsgültig". Wo genau dä Zuun isch düregange, weiss i nid. Es muess aber ir Vogtei Trachsuwaud sy gsy. Öb dä Zuun würklech ewig isch, weiss i nid. Wener no steit, sy d Schwiere nach guet 550 Jahr sicher afange chly murb!

Quellen: "Ortsnamensbuch des Kantons Bern", "Orts- und Flurnamen des Amtes Entlebuch", www.idiotikon.ch und weitere.